गेल्या काही दिवसांपासून रणवीर अलाहाबादिया प्रकरणाची जोरदार चर्चा पाहायला मिळत आहे. रणवीर अलाहाबादियानं त्याच्या ‘इंडियाज गॉट लेटंट’ शोमध्ये केलेल्या अश्लील टिप्पणीवरून मोठा वाद निर्माण झाला आहे. या विधानाबाबत रणवीरनं नंतर माफदेखील मागितली. मात्र, ऑनलाईन प्लॅटफॉर्म्सवर अशा प्रकारचा मजकूर जाणं सामाजिक नैतिकतेला धरून नसल्याचं म्हणत रणवीरवर सर्वच स्तरातून टीका केली जात आहे. रणवीरविरोधात गुन्हे दाखल झाले असून अटकेपासून संरक्षण मिळावं, यासाठी रणवीर अलाहाबादियानं सर्वोच्च न्यायालयात धाव घेतली होती. या याचिकेच्या सुनावणीदरम्यान न्यायालयाने अलाहाबादियाला चांगलंच सुनावलं आहे. तसेच, अशा प्रकारच्या मजकुराला आळा घालण्यासाठी निर्बंधांचेही सूतोवाच केले आहेत.
सर्वोच्च न्यायालयाने रणवीर अलाहाबादियाला सुनावलं
दरम्यान, आज झालेल्या सुनावणीदरम्यान सर्वोच्च न्यायालयाने रणवीर अलाहाबादियाला कठोर शब्दांत सुनावलं आहे. एकीकडे त्याला अटकेपासून संरक्षण दिलं असतानाच दुसरीकडे न्यायालयाने आक्षेपार्ह विधानाबाबत रणवीरचे कान टोचले आहेत. “अभिव्यक्ती स्वातंत्र्याच्या नावाखाली, समाजाच्या नियमांविरोधात बोलण्याचा कोणालाही परवाना मिळालेला नाही. ही अश्लीलता नाही तर काय आहे? आई-वडिलांना, बहि‍णींना लाज वाटेल असे तुमचे शब्द आहेत”, अशा शब्दांत न्यायालयाने रणवीर अलाहाबादियाच्या आक्षेपार्ह विधानाचा समाचार घेतला.
सर्वोच्च न्यायालयाने आज उल्लेख केलेले महत्त्वाचे मुद्दे…
१. रणवीरविरोधात दाखल झालेल्या गुन्ह्यांप्रकरणी त्याला अटकेपासून दिलासा
२. यानंतर रणवीरविरोधात त्या विधानांसाठी कोणताही नवीन गुन्हा दाखल होणार नाही
३. जर अलाहाबादियाला जीविताला धोका आहे असं वाटत असेल, तर महाराष्ट्र किंवा आसामच्या स्थानिक पोलिसांकडे तो संरक्षणाची मागणी करू शकतो
४. रणवीर अलाहाबादियानं त्याचा पासपोर्ट ठाणे पोलिसांकडे जमा करावा, न्यायालयाच्या परवानगीशिवाय विदेश प्रवास करता येणार नाही
५. रणवीर अलाहाबादियानं या प्रकरणाची सुनावणी पूर्ण होईपर्यंत कोणताही शो करू नये
बार अँड बेंचनं दिलेल्या या महत्त्वाच्या मुद्द्यांशिवाय न्यायालयाने आणखी एका मुद्द्यावर केलेलं भाष्य रणवीरप्रमाणेच समस्त यूट्यूबर्स, इन्फ्युएन्सर्स व सामान्य नेटिझन्ससाठीही महत्त्वाचं आहे. न्यायालयाने यावेळी ऑनलाईन प्लॅटफॉर्म्सवर दाखवल्या जाणाऱ्या अश्लील मजकुरावर निर्बंध आणण्याबाबत टिप्पणी केली. तसेच, यासंदर्भात केंद्र सरकारने त्यांची भूमिका स्पष्ट करावी, असंही न्यायालयाने यावेळी नमूद केलं.
कॉमेडियन समय रैनाच्या इंडियाज गॉट लेटेंटच्या एका भागात अलाहाबादियाने तुच्छ विनोद करत लोकांचं लक्ष वेधलं. त्याच्या या आक्षेपार्ह टिप्पणीमुळे संताप निर्माण झाला आणि महाराष्ट्र व आसामध्ये गुन्हे दाखल करण्यात आले. हा शो मर्यादित प्रेक्षकांसाठी होता, परंतु क्लिप्स व्हायरल झाल्या, त्यामुळे प्रतिक्रिया तीव्र झाल्या. टीका वाढत असताना अलाहबादियाने जाहीर माफी मागितली आणि कबूल केले की त्याने सर्व मर्यादा ओलांडल्या आहेत. तर, समय रैनाने त्याच्या युट्यूबवरील सर्व व्हिडिओही हटवले आहेत.
'इंडियाज गॉट लेटेंट' हा स्टँड-अप कॉमेडियन समय रैनाचा शो आहे, जो वादाचा सामना करत आहे. हा भाग ८ फेब्रुवारी रोजी युट्यूबवर प्रदर्शित झाला. या शोमध्ये बोल्ड कॉमेडी कंटेंट आहे. या शोचे जगभरात ७३ लाखांहून अधिक सबस्क्रायबर्स आहेत. या शोमध्ये पालक आणि महिलांबद्दल अशा गोष्टी बोलल्या गेल्या, ज्यांचा येथे उल्लेख करू शकत नाही.
समय रैनाच्या या शोच्या प्रत्येक भागाला YouTube वर सरासरी 20 दशलक्षाहून अधिक व्ह्यूज मिळतात. या शोचे परीक्षक वेळ वगळता प्रत्येक भागात बदलत राहतात. प्रत्येक भागात एका नवीन स्पर्धकाला सादरीकरण करण्याची संधी मिळते. स्पर्धकाला त्याची प्रतिभा दाखवण्यासाठी ९० सेकंद दिले जातात.
