पोटॅटो गार्लिक टिक्का
साहित्य : 10 बेबी पोटॅटोज (दोन भाग केलेले), 1 कप सिमला मिरची मोठे चौकोनी तुकडे केलेली, 2 कांदे मोठे चौकोनी तुकडे केलेले, 10 काजू (भिजवून 1 टेबलस्पून पाण्यात बारीक वाटून घेतलेले), 1 टेबलस्पून लसणाची पेस्ट, पाऊण कप घट्ट दही, 2 टीस्पून लाल मिरची पूड, 2 टीस्पून धणे पूड, 1 टीस्पून आल्याची पेस्ट, 1 टीस्पून कसुरी मेथी, 1 टेबलस्पून लिंबाचा रस, स्वादानुसार मीठ, आवश्यकतेनुसार तेल, थोडी बारीक चिरलेली कोथिंबीर.
कृती : ओव्हन 180 डिग्री सेल्सियसवर प्रीहिट करत ठेवा. पॅनमध्ये पाणी गरम करून त्यात बेबी पोटॅटोज 10 मिनिटं नरम होईपर्यंत शिजवा. एका वाडग्यात काजूची पेस्ट, आलं-लसणाची पेस्ट, दही, लाल मिरची पूड, धणे पूड, कसुरी मेथी, मीठ आणि लिंबाचा मिसळा. त्यात बटाटे, सिमला मिरची आणि कांदा घालून अर्धा तास मॅरिनेट होण्यासाठी बाजूला ठेवून द्या. नंतर मॅरिनेटेड बटाटे, सिमला मिरची आणि कांद्याचा एक-एक तुकडा सळई लावून त्यावर ब्रशच्या साहाय्याने तेल लावा. ही सळई प्रीहिटेड ओव्हनमध्ये 20 मिनिटं बेक करण्यासाठी ठेवून द्या. गरमागरम पोटॅटो गार्लिक टिक्का हिरव्या चटणीसोबत सर्व्ह करा.
चिली पोटॅटो
साहित्य : 3 बटाटे, अर्धा कप मैदा, अर्धा कप कॉर्नफ्लोअर, आवश्यकतेनुसार तेल, 2 टीस्पून बारीक चिरलेली लसूण, आल्याचा एक मोठा तुकडा बारीक चिरलेला, 2-3 हिरव्या मिरच्या बारीक चिरलेल्या, 2 टीस्पून सोया सॉस, 1 टीस्पून व्हिनेगर, पाव टीस्पून काळी मिरी पूड, स्वादानुसार मीठ, 1-2 कांद्याच्या हिरव्या पाती बारीक चिरलेल्या.
कृती : बटाटे तासून, त्याचे पातळ लांबट तुकडे करून घ्या. बटाट्याच्या या फोडी स्वच्छ धुऊन कोरड्या करून घ्या. एका वाडग्यामध्ये मैदा, कॉर्नफ्लोअर (2 टीस्पून बाजूला काढून ठेवा) आणि आवश्यकतेनुसार पाणी मिसळून पातळ घोळ तयार करा. कढईमध्ये तेल गरम करत ठेवा. आता बटाट्याची एक-एक फोड मैद्याच्या मिश्रणात घोळवून गरम तेलात सोनेरी रंगाची होईपर्यंत तळून घ्या. अशा प्रकारे सर्व बटाट्याच्या फोडी तळून घ्या. आता एका कढईमध्ये 2 टीस्पून तेल गरम करून त्यात लसूण, हिरवी मिरची आणि आलं घालून परतवून घ्या. नंतर त्यात सोया सॉस, व्हिनेगर, मीठ आणि अर्धा कप पाणी मिसळून मिश्रणाला उकळी येईपर्यंत शिजवा. एका वाटीत 2 टीस्पून कॉर्नफ्लोअरमध्ये थोडं पाणी मिसळून एकजीव करा. कढईतील मिश्रणाला उकळी आली की, त्यात कॉर्नफ्लोअरचं मिश्रण मिसळा. मिश्रण सतत ढवळत राहा. मिश्रण दाट झालं की, आचेवरून खाली उतरवा. त्यात तळलेल्या बटाट्याच्या फोडी घालून चांगलं एकजीव करा. त्यावर कांद्याच्या हिरव्या पाती घालून सजवा आणि गरमागरम सर्व्ह करा.
