नव्वदच्या दशकात सलमान खान आणि माधुरी दीक्षितची जोडी खूप हिट झाली. या दोघांनी 'हम आपके है कौन', 'साजन', 'हम तुम्हारे हैं सनम' आणि 'दिल तेरा आशिक' यांसारख्या चित्रपटांमध्ये एकत्र काम केले होते. तेव्हा प्रत्येक चित्रपट निर्माते माधुरी आणि सलमानला आपल्या सिनेमात घेण्यासाठी तरसायचे. 'हम आपके है कौन' नंतर माधुरी आणि सलमानची जोडी ब्लॉकबस्टर ठरली. आपल्या चित्रपटाच्या ब्लॉकबस्टर यशाने सूरज बडजात्या खूप खूश होते. म्हणूनच त्यांनी पुढे माधुरी दीक्षितला त्यांचा पुढचा चित्रपट 'हम साथ साथ हैं'मध्ये सलमानसोबत कास्ट करण्याचा निर्णय घेतला होता. मात्र अभिनेत्रीने हा चित्रपट नाकारला.
१९९९ मध्ये 'हम साथ साथ हैं' रिलीज झाला होता. या सिनेमात अनेक दिग्गज कलाकारांनी काम केले होते. कौटुंबिक नात्यावर आधारित असलेला हा सिनेमा त्यावेळी खूप गाजला. 'हम साथ साथ हैं'मध्ये तब्बूने सलमान खानच्या वहिनीची भूमिका केली होती. पण तब्बूची ही भूमिका आधी माधुरी दीक्षितला ऑफर झाली होती हे फार कमी लोकांना माहीत असेल. पण तो सिनेमा करण्यास अभिनेत्रीने नकार दिला. यामागील कारण होता सलमान खान, ज्याचा खुलासा माधुरीने एकदा 'रेडिफ'ला दिलेल्या मुलाखतीत केला होता.
माधुरीने सांगितले होते की, तिला या चित्रपटात सलमानच्या वहिनीची भूमिका करायची नव्हती. तिने आणि सलमानने कोणत्याही चित्रपटात भावजय आणि वहिनी व्हावे असे तिला वाटत नव्हते. कारण त्या आधीच्या 'हम आपके है कौन' या चित्रपटात माधुरीने सलमानसोबत रोमान्स केला होता. 'हम साथ साथ है' नाकारण्याचे खास कारण देताना माधुरी म्हणाली होती की, चित्रपटात एक सीन आहे, जिथे सलमान साधना भाभीच्या पायाला स्पर्श करतो. तिला वाटले की जर तिने ही भूमिका केली असती तर सलमानला तिच्या पाया पडावे लागले असते. आणि लोकांना ते कधीच आवडले नसते.
सूरज बडजात्या यांना माधुरी दीक्षितला 'हम साथ साथ हैं'मध्ये कास्ट करायचे होते, पण अभिनेत्रीने छोटी भूमिका करण्यास नकार दिला. शेवटी सूरज बडजात्या यांना तब्बूला साधना भाभीच्या भूमिकेत साइन करावे लागले.
